Lütt beten wat vun fröher…

De Speeldeel Dänischenhagen is 1946 vun den domaligen Schoolleiter Bruno Kallweit gründ´t wurrn.

V.l.: Willi Kühl, Lieselotte Willrodt, Heini Denker, Mary Schmidt, Gerhardt Willrodt
sitzend: Speelbaas Bruno Kallweit

In de ersten Johren na´n Krieg sünd jümmers bloots Eenakter instudeert und upföhrt wurrn. As denn de Kiekkasten in Mood keem, hett de Speeldeel een ganze Tied lang Paus maakt. Erst to de Hundert-Johr-Fier vun de Gemeen Dänischenhagen in´t Johr 1976 is wedder een plattdüütsche Komödie, een Dreeakter, instudeert und in den Kroog „Zur Eiche“ in Dänischenhagen upföhrt wurrn. All domals müss dat Stück een poor mal speelt warrn, üm de Nahfraag na Korten tofreden stellen to künnen. Düsse Erfolg föhrte denn dorto, dat nu jedes Johr een niege Dreeakter upföhrt wurrn is. Jedet Johr keemen wiedere Vörstellungen dorto, so dat nu rd. twintig Vörstellungen in de Tied vun Midde März bet Ende April wiest ward. All Vörstellungen gifft dat in unsen Kroog „Zur Eiche“ in Dänischenhagen.

Mit de Proben fang wi mehrstieds all in Dezember an; Premiere is denn Midde März in´t tokamen Johr. Wi draapt uns twee- bet dreemal de Wuch, vun Anfang Februar an up de Bühne. Dat, wat vun dat Intrittsgeld överblieven deiht, dat spend wi jedes Johr för wohltätige Zwecke in Dänischenhagen und ok so´n beten rundüm.

De Leitung vun uns Grupp hett bet 1980 de Gründer vun de Speeldeel, Bruno Kallweit, hatt. Denn hett de langjöhrige Mitspeeler und domalige Börgermeister vun de Gemeen Dänischenhagen, Gerhard Willrodt, de Leitung övernahmen. As Gerhard Willrodt 1983 storben is, hett Renate Burow, de vörher ok all veele, veele Johrn up de Bühne stahn harr, dat wiedermaakt. Siet 2001 liggt de Leitung vun uns Theatergrupp in de Hänn vun Fritz Mißfeldt und Frauke Willrodt, de beide ok all siet över 25 Johr dorbi sünd.

So as all plattdüütsche Theatergruppen fehlt ok uns junge Lüüd, de Lust hebbt, up de Bühne to stahn. Wer noch keen platt kann, de schull sick liekers mal an uns wend´n. Wi bringt em dat schon bi.